Վարձով բնակարանում, որում ես մոտ 5 տարի ապրել եմ, իսկ դրանից առաջ էլ ուրիշներն են ապրել, այդ տունը հանձնելուց մի երկու օր հետո “Ջրմուղից” ստուգել են և պարզել են, որ ջրաչափերը (2 հատ են) վնասված են, իսկ ավելի կոնկրետ կափարիչների վրա անցքեր են արված, որոնց մեջ լար մտցնելով կարելի է կանգնեցնել ջրաչափը (համենայն դեպս այդպես ասացին ստուգողները)։ Այդ անցքերը ես չեմ արել, վստահ եմ, որ չեն արել նաև տանտերերը. հետևաբար արել են ինձնից առաջ ապրողները կամ ի սկզբանե այդ ջրաչափերն այդպիսին են եղել։ 5 տարվա ընթացքում երբևէ որևէ մեկը նմանատիպ ստուգումով չի այցելել ինձ, “ջրի մարդը” ամիսը մի անգամ կամ անձամբ եկել, կամ զանգով ճշտել է ցուցմունքը և այցելություններից ոչ մեկի ժամանակ բառ անգամ չի ասել, թե խնդիր կա, թեև անցքերը ջրաչափի վերևի մասում են և երևում են։ Ինքս երբեք այդ անցքերին ուշադրություն չեմ դարձրել և մտքովս էլ չի անցել, թե ինչ-որ բան այն չի. ջուրը միացնում եմ, սլաքները ֆռռում են, ուրեմն նորմալ է։ Բոլոր մուծումները կանոնավոր ու ժամանակին արել եմ, պարտքեր չեմ թողել։ “Ջրմուղը” սպառնում է տուգանքով, իսկ տուգանքի չափի մասին հարցին ստուգողները պատասխանեցին. “էգուց եկեք, տեսնենք”։ Ու թեև այդ տունն իմը չի, այնտեղ այլևս չեմ ապրում, բայց չեմ կարող ասել. “ոչ մի բան չգիտեմ ու գործ չունեմ, դուք, ձեր տունը”, այդպես ճիշտ չի լինի։ Հիմա հարց. ի՞նչ է սպառնում մեզ և մասնավորապես հնարավոր տուգանքի չափը ինչքա՞ն է։ Արդյո՞ք տուգանքն ընդհանրապես հիմնավոր է, հաշվի առնելով, որ իրենց աշխատակիցը երբեք առարկություններ չի ներկայացրել, նմանատիպ ստուգումներ առնվազն 5 տարի չեն արել։ Ի՞նչ անել, եթե ինչ-որ աստղաբաշխական թիվ կրակեն։ Եվ վերջապես, ջրաչափի կափարիչի վրա որևէ անցք իսկապե՞ս չի լինում։ Ցանկացած խորհրդի համար կանխավ շնորհակալություն։

Թարմացում.
http://koreolan.livejournal.com/122523.html

Պիտակներ. անձնական, Ջրմուղ

Ինձ միշտ թվում էր, որ զանազան դիլետանտներն ու կիսագրագետները մեծ, դարակազմիկ ու ամեն ինչ գլխիվայր շուռ տվող հայտնագործություններ անելու իրենց ձգտումները փորձում են իրականացնել հիմնականում հումանիտար գիտություններում. պատմություն, լեզվաբանություն և այլն: Առավել համարձակները քիթները խոթում են նաև բնական գիտությունների բնագավառները. բիոլոգիա, քիմիա և, իհարկե, ֆիզիկա ու հատկապես հարաբերականության տեսություն: Բայց երբեք մտքովս չէր անցնի, որ կգտնվեն նաև հերոսներ, ովքեր կորոշեն գլիվայր շուռ տալ ոչ ավել, ոչ պակաս մաթեմատիկան: Բայց, պարզվում է, որ կան նաև մաթեմատիկայով զբաղվող չոռը տարածներ: Ահավասիկ այդպիսի մի հիասքանչ սուբյեկտ. ինչի՞ է հավասար y=2x ֆունկցիայի ածանցյալը: Անուն էլ ունի ” կառուցվածքային անալիզ:

Պիտակներ. անձնական, մաթեմատիկա

Նենց եմ սիրում, երբ որ ինձ վերագրում են որոշակի մտքեր, կարծիքներ, հայացքներ, որոնք իմ մոտ բացարձակապես բացակայում են, հետո էլ այդ ինձ վերագրվածը վերցնում ու ջանադրաբար քննադատում, փոշիացնում են, քարը քարի վրա չեն թողնում և դեռ մի բան էլ սպասում են, որ ես պիտի առարկեմ, պաշտպանեմ այդ “իմ” մտքերը, կարծիքները, հայացքները:

Պիտակներ. անկապ, անձնական

Արարատյան Հայրապետական թեմի կայքում բան էի փնտրում: Այս հղման http://araratian-tem.am/media/Azgapatum%203.pdf մեջ pdf ֆայլի անունը ջնջեցի ու ռաստվեցի սրան. araratian-tem.am/media , որից ի դեպ նաև անտիվիրուսս սկսեց վրդովվել: Չգիտեմ, թե ինչքան ժամանակ է ինչ այսպես է: Ինքը կայքը կարծես թե նորմալ է աշխատում: Ինչքան հասկանում եմ, սա էլ վնասված էջ չի, այն որպես էջ նախատեսված չի էլ եղել: Հիմա նաև նամակ կգրեմ, հույս ունեմ, որ արագ կարձագանքեն:

Պիտակներ. հայկական կայքեր

Էս Հ2-ը բռնաբարեց, թողեց. ոնց որ Ասատրյանների ընտանեկան վիդեոկատալոգ էղնեն:

Պիտակներ. Հ2

Գիտականության չափանիշներից մեկը (ամենևին ոչ միակը և առավել ևս միանշանակ ընդունվողը) հերքելիության չափանիշն է: Այդ չափանիշի էությունը կայանում է նրանում, որ գիտական են այն տեսությունները, որոնքը սկզբունքորեն անհերքելի չեն, այսինքն՝ ենթադրվում է, որ կարող են ի հայտ գալ այդ տեսությունը հերքող փաստեր: Առաջին հայացքից կարող է տարօրինակ թվալ, սակայն դա միայն առաջին հայացքից: Միայն այն դեպքում իմաստ կունենա գիտականորեն քննարկել որևէ տեսության իսկությունը, եթե այն հերքելի է: Հատուկ ընդգծեմ, որ տեսության հերքելի և հետևաբար գիտական լինելը չի նշանակում տեսության ճշմարիտ լինել: Գիտական տեսության ճշտությունը ստուգվում է հայտնի փաստերի, իսկ բնական գիտությունների դեպքում նաև փորձերի հիման վրա:

Թերևս սա է դիլետանտ հետազոտողների առաջ քաշած տեսությունների հիմնական թերություններից մեկը. այդ տեսությունները, որպես կանոն, ի սկզբանե ունեն անհերքելիության հավակնություններ և բոլոր փաստերը հարմարեցվում են այդ տեսություններին: Օրինակ՝ եթե մարդը նպատակ է դրել ապացուցել, որ հայ ժողովուրդը 8000 տարեկան է, իսկ հակառակն ապացուցող փաստերի մասին հայտարարում է, թե դրանք պարզապես կեղծիքներ են, ապա այդ մարդու առաջ քաշած տեսությունն ակնհայտորեն անհերքելի և հետևաբար հակագիտական տեսություն է (ընդհանրապես, սեփական ճշմարտությունը պնդող տեսությունները նաև ֆորմալ տրամաբանության տեսանկյունից են “անհետաքրքիր”):

Պիտակներ. գիտություն